- Lugar: O Briño.
- Parroquia: San Martiño de Cerceda.
- Denominación: Igrexa parroquial de San Martiño de Cerceda.
- Cronoloxía: Século XVIII.
Preto da capital do concello atópase este templo rural ben conservado e situado nun contorno moi ben coidado, facendo conxunto co camposanto.
A estrutura arquitectónica do edificio é de planta rectangular, cunha soa nave con cuberta de madeira de recente construción e tellado a dúas augas no exterior, e presbiterio cuadrangular ao que se engade unha pequena sancristía. No interior un arco triunfal separa a nave do altar, cuberto con bóveda de canón .
A sinxela fachada principal, de cantería vista, repite o esquema clásico: porta rectangular moldurada, van en forma de óculo, tamén moldurado, e espadana de dous vans rematada en pináculo con bóla, mentres que o resto da construción aparece parcialmente revocado.
No seu interior, no altar maior, sitúase un sinxelo retablo, no que aparece a imaxe de San Martiño, santo protector do templo.
