- Lugar: Rodís.
- Parroquia: San Martiño de Rodís.
- Denominación: Igrexa parroquial de San Martiño de Rodís.
- Cronoloxía: Século XII (orixe románica). Fachada do século XIX.
A igrexa rural é de orixe románica e está nun aceptable estado de conservación. Sitúase nun contorno de gran fermosura, co campo de festas no lateral dereito e grandes árbores.
A planta, rectangular, remata nunha ábsida cuadrangular de menor tamaño á que engade outro pequeno espazo, no que se sitúa a sancristía, creando no exterior un xogo de volumes cúbicos.
Consta dunha única nave con arco triunfal que separa o altar cuberto por bóveda de canón. Os contrafortes exteriores e os canzorros sostendo a cornixa lembran a súa orixe románica.
A fachada presenta o reiterado esquema de porta, óculo e pequena fiestra abucinada e como coroación do cume, que remata en forma curva, unha torre campanario, con cúpula de pedra. Nunha das fachadas laterais aparece unha entrada, hoxe tapiada.
