Moi preto do núcleo máis poboado de Frades (A Ponte Carreira) está a igrexa parroquial de Santa Mariña de Gafoi. Esta é unha parada obrigada para os amantes da arquitectura relixiosa. O templo, probablemente anterior ao século XII, móstranos claros elementos románicos como é o caso da súa porta, na que atopamos figuras zoomorfas, antropomorfas e vexetais. No adro tamén podemos atopar unha cruz celta de granito.
O inmoble, con remodelacións notables na época barroca, presenta unha planta rectangular con presbiterio separado por arco triunfal, que acolle un retablo de madeira tamén barroco, con columnas abalaustradas.
