Preto de 100 persoas percorrerán mañá, sábado 12 de outubro, unha parte do territorio da Mancomunidade de Ordes. En concreto, discorrerán polos concellos de Ordes e Oroso a través do VII Raid Odiseo Terras de Ordes. A proba, puntuable para a Liga Galega de Raids de Orientación, contará cunha trintena de equipos procedentes de toda Galicia, doutras comunidades como Asturias e tamén de países como Portugal.
O evento está organizado pola Mancomunidade de Ordes e o Club Seo, que contan co apoio da Deputación da Coruña. Con este tipo de iniciativas, a Mancomunidade continúa reafirmando a súa aposta por dar a coñecer o territorio promovendo, iso si, un turismo sostible e en contacto coa natureza.
Durante o Raid Odiseo, os equipos participantes deberán cubrir un extenso percorrido valéndose, unicamente, de mapas e dun compás. Isto é, terán restrinxido o uso de teléfonos móbiles e dispositivos de xeolocalización.
A proba conta con varias categorías. Por un lado, na 3.0 os equipos terán que cubrir unha distancia de 97 km nun tempo máximo de 12 horas. Polo outro, na 2+1 a distancia será a mesma, estando dirixida a equipos aventura masculino e aventura mixto. Por último, a OrientaRaid terá un percorrido de 57 km a concluír en, como máximo, seis horas.
O evento arrincará mañá, ás 7.30 horas, coas verificacións. Ás 9.00 horas será a saída dos equipos de elite e ás 14.00 horas a dos de iniciación. Tendo en conta os tempos fixados pola organización, os primeiros grupos chegarán á liña de meta ás 19.30 horas. O Raid concluirá coa entrega de premios aos equipos que obtiveran mellores resultados. Esta será ás 21.30 horas no Campo da Feira de Ordes.
