Na parroquia ordense de Poulo está o lugar da Calle, un dos máis singulares do municipio. Atravesado polo Camiño Inglés, son moitos os peregrinos que cada ano transitan esta calzada. O conxunto de inmobles á beira da vía xacobea garda un anaco de historia maiúscula. Nunha pedra da chamada Casa Maldonado atopamos unha inscrición que deixa constancia que alí pernoctou o todopoderoso rei Felipe II en 1554, cando ía camiño das illas británicas para casar con María I de Inglaterra.
Uns metros máis adiante podemos ver un fermoso cruceiro. Por último podemos facer unha parada na capela da Virxe da Merce, á que acoden cada ano moitos romeiros da zona buscando os seus favores.
