Cando o peregrino que transita o Camiño Inglés entra en terras de Oroso faino sabendo que está ás portas do seu destino. A etapa non pode ser máis pracenteira, xa que o tramo orosino combina os mellores ingredientes para o camiñante: fermosísimas paisaxes e un vizoso patrimonio histórico e cultural. Ao pé da ruta, cando non nela mesma, están lugares como o Castro de Vilabarro, A Ponte Ulloa ou A Ponte Sigüeiro.
A ledicia aumenta máis se cabe na última etapa. Dende Sigüeiro, principal núcleo de Oroso, ata a catedral de Santiago de Compostela hai apenas 16 quilómetros. É habitual ver os peregrinos dende moi cedo tomando o almorzo en calquera dos abundantes locais hostaleiros. Eles e elas, os verdadeiros protagonistas do camiño, enchen de cosmopolitismo e ilusión as rúas da vila.
