A Vía Verde Cerceda-Santiago de Compostela vai ser unha das maiores infraestruturas deste tipo en Galicia. Ao longo do percorrido, ademais dunha vizosa natureza, os sendeiristas e ciclistas que a transiten van atopar magníficos exemplo da arquitectura civil de mediados do século XX.
En Oroso é visita obrigada a chamada Estación de Garga, un inmoble hoxe en desuso pero no que é fácil imaxinar as ducias e ducias de viaxeiros que cada día collían o tren para se dirixir a Santiago de Compostela ou á Coruña. A estación mantén o seu encanto, e a pesar do paso das décadas emerxe con orgullo entre o manto verde que a rodea.