Sen os muíños sería imposible comprender a nosa sociedade tradicional. Eles son fontes de múltiples historias, de esperanzas, de amores, de penas…pero sobre todo de fartura, en tempo nos que a abundancia non era tanta. O complexo hidráulico para moer cereais máis senlleiro da zona é, sen dúbida, a coñecida como Aceña de Estevo.
Aínda en funcionamento, quen se achegue ata alí descubrirá o desenvolvida que era a enxeñería popular: enerxía renovable en estado puro. A isto hai que sumar que a construción se atopa envolta polo río e as árbores da ribeira: unha postal que non debe perder o viaxeiro que percorra estas terras.
